Յիսուսեան միաբան Հայր Ժորժ Ռույսէնը` կը բանախօսէ Երևանի Մեսրոպ Մաշտոց Մատենադարանի մէջ։

(Ռատիօ Վատիկան)  2017-ի մայիսի 31-ին, ժամը 11.00-ին, Երևանի Մեսրոպ Մաշտոցի անուան Մատենադարանի մէջ տեղի ունեցաւ «Հայկական հարցը» 1894-1896թթ., 1908-1925թթ., փաստավաւերագրական 7 հատորեայ ժողովածուին նուիրուած բանախօսութիւն, զոր ներկայացուց վերոնշեալ  ժողովածուի հեղինակ` Հռոմի քահանայապետական արևելագիտութեան հաստատութեան եկեղեցական իրաւունքի մասնաճիւղի դեկան` հ. Ժորժ Անրի Ռույսէնը: 

Հայր Ռույսէնը վատիկանեան գաղտնի և Արևելեան Եկեղեցիներու ժողովի արխիւներէն հաւաքած ու համակարգած է Հայկական հարցի վերաբերեալ փաստերն ու փաստաթուղթերը այնպէս ինչպէս ընկալուած, հաղորդուած ու մեկնաբանուած էին կաթողիկէ եկեղեցւոյ կողմէն։  

Հ. Ռույսէն Յիսուսեան կրօնաւոր է։ Մասնագէտ կանոնագիտութեան եւ դասախօս Հռոմի ՙՔահանայապետական Արեւելեան Համալսարանի՚։

Իր բազմաթիւ կանոնագիտական աշխատանքներուն կողքին ան միշտ մեծ հետաքրքրութիւն ցուցաբերած է հայագիտական հարցերու հանդէպ։ Երբեմն նոյնիսկ վրդովում յայտնած է՝ թէ ինչու հայեր տրամադիր չեն եղած Վատիկանի դիւաններուն մէջ ուսումնասիրութիւններ կատարելու։

Հ. Ժորժ-Անրի Ռույսէնի վերոնշեալ աշխատանքը կարող ենք համարել վատիկանեան ու կաթողիկէ եկեղեցւոյ արխիւներուն հայող հայկական հարցի մասին մինչեւ օրս կատարուած ամենէ ծաւալուն ուսումնասիրութիւնը որ որպէս աղբիւր ծառայած է նաեւ հայոց ցեղասպանութեան մասին հրատարակուած այլ հատորներու։ 

Յայտնենք թէ Վերոնշեալ ձեռնարկին իրենց ողջոյնի խօսքը ուղղեցին նաև Մատենադարանի տնօրէնի ժամանակաւոր պաշտօնակատար Պրն. Վահան Տեր-Ղևոնդյանը և Վատիկանի Գաղտնի արխիւներու և Առաքելական գրադարանի ղեկավար` Գերապայծառ Ժան-Լուի Պրիւկէսը: